Luk 16 | KQC | STEP | Iesu ka ini usi dina vene rofu niyo, “Gugura fore tau amiye yokoi ini gugura nari redo amiye yokoi nufa amegamo. Mina gugura fore tau amiye ni oteimaradi bi ini gugura nari redo amiye yaku ini fore iri vau regamo.

e 16.16:Mt 11.12–13

g 16.18:Mt 5.32; 1 Cor 7.10–11

Luke 16

Gugura fore nari redo amiye mokena buni nufa

1 Iesu ka ini usi dina vene rofu niyo, “Gugura fore tau amiye yokoi ini gugura nari redo amiye yokoi nufa amegamo. Mina gugura fore tau amiye ni oteimaradi bi ini gugura nari redo amiye yaku ini fore iri vau regamo. 2 Dada raka nisi niyo, ‘Na bi mina sina nidedi neideida. Nai fore gokai makusa mina bi buni na oteimagiya, adina ya bi nai gugura tau moi ourefeidesa bi moi dairigida.’ 3 Mina naivo amiye yaku iniye kamini niyo, ‘Nai amiye tora bi nai moimairi kamini na moi etaga rigo ma na bi kono goenari yeiva de ma amiye rofu ni guba renari ka maena reida; dada na bi beika regida? 4 Idu ida yokoi amedo bi na na diba; nai moimairi nai moi etaga rigo ri, nai asiyaka vene yaku ini yavari na moi afei dui regedi.’

5 “Kamini kaere ini amiye tora rofu ini beika moiyadi rofu gabi mago vene raka ni vau resi amiye yokoi siko rofu ni kaiteyo, ‘Ya bi nai amiye tora rofu bi gokaisa magiya?’ 6 ‘Olive oira botoro 100 ^{▼▼16.6Mina bi 3,000 litres kana.} magida,’ vo niyo. Ma yaku niyo, ‘Yi moiyo kana fefa bi mini, moisi ameinu resi evade 50 bura ri.’ 7 Resi yokoi ni kaiteyo, ‘Ma ya bi gokaisa magiya?’ Ina yaku niyo, ‘Witi fuse 100.’ ^{▼▼16.7Mina bi 21,000 kilogrammes kana.} Kamini ina rofu niyo, ‘Yi moiyo kana fefa bi mini, moisi 80 bura ri.’

8 “Gabi ini amiye tora yaku makai reyo ma neideyo dada ini roka ni odoro reyo, adina bi mokena buni dudu ini moimai reyo; dada mina kono vene diba mokena buni dudu ini moimai rededi, idu vabara vene ini diba bi keika mokena buni dudu ini moimai rededi.”

9 Ma Iesu ka niyo, “Mina dada ya vene rofu nida: yi kono di gugura dudu vegu rau rega auta refa, ye mina gugura koina nigo ri Sei yaku ini ari neinei amedo yavari ya afei dui regedi dada. 10 Kaere amiye yaku beika keikakeika rofu nari rei mona rego, ina bi beika tora ka nari rei mona rego. Idu beika keikakeika de ofaofa dudu nari rego amiye bi beika tora rofu ka ofaofa dudu de nari rego. 11 Ya kono di gugura de nari rei mona reyadi vo nisi, ya yaku gugura rama ^{▼▼16.11Mina bi oma di gugura mini.} dudu ka de nari rei mona regedi. 12 Resi ya bi amiye be di gugura nari rei mona de reyo vo nisi bi, kaere yaku yi gugura rama ya mago?

13 “Naivo amiye yaku amiye tora remanu di moimai de rego. Adina bi yokoi rofu bi gubuyo resi yokoi rofu bi uka mago; o ina bi yokoi di ago neidesi yokoi rofu bi anema kora rego. Ya bi Sei ma fore ka di naivo amiye anua moimai regedi.” ^d

Iesu di ini sina be

(Mt 11.12–13; 5.31–32; Mk 10.11–12)

14 Pharisee vene yaku mina sina neideyadi ri, bi Iesu ni ninika reyadi, adina ina vene bi fore mokei tora rededi. 15 Idu Iesu yaku ina vene rofu niyo, “Ya vene yaku amiye di nemokori ya kaya yi vegu bi rorobo moi ofaofa ago vo niga rededi, idu Sei bi ina diba yi uka mokena; adina beika gugura bi buni iniye amiye di mokenari mina bi Sei di nemokori no iniye kino nufa.

16 “Moses di ago gira ma Sei di ago nidedi vene di ago bura reyadi bi ni ogau regamadi ma John Baptist di okina ariri baiyo. Mina ariri gutu Sei di ourefeidena amena sana di sina buni bi ni ogau rededi mini ma tau bi ini yeiva tau dudu dui regika rededi. ^e 17 Idu oma ma kono bi ini ida nufa roro nigedi, idu Ago Gira bura reyadi mina di tuta yokoi kava mina de roro nigo. ^f

18 “Kaere amiye ini rema feresi rema bouna mesi bi koa rego; ma kaere amiye yaku mina fereyo rema mego ri, bi ina ka bi koa rego. ^g

Gugura tau amiye ma Lazarus

19 “Gugura tau amiye yokoi amegamo; ina bi varuka burefe iniye mina risi ada regasa iruku buni ari neinei irigamo. 20 Ina yava ida nefauri bi irava amiye ini roka Lazarus mina bae amegamo. Ini rovaita mina bi ara yaku ni vai rena iniye reyo. 21 Ini ukari mokegamo bi mina gugura tau amiye di iruku bubudo ini teiborori yareyadi mina irigo. Auna yaku ka bosi ini ara uaka regamadi.

22 “Mina irava amiye muyeyo ri, bi Sei di naivonaivo amiye yaku Abraham atafu afei boyadi. Kamini gugura tau amiye ka muyeyo ma guri aiyadi. 23 Ita mukuna sanari ^{▼▼16.23 ita mukuna sana:Muyena sana.} esika moiga ameyo ri, bi ini nemoko maku boyo ri, bi maikeri gutu Abraham veyo ma Lazarus bi ina atafu ameyo. 24 Dada raka niyo, ‘Abraham, nai baba, na iriyeduka re! Lazarus ni feidegiya ma ini vana metona dudu koruri bi risi nai afiye moi amuta reyaine, adina na bi esika tora iniye mina ita ideri moida!’

25 “Idu Abraham yaku niyo, ‘Nai mida, moke, yi vegu amegamo ri, gugura buni moigamo ma Lazarus bi no mina moiyo. Idu ya esika moisa ri, ina bi minari gua ada redo. 26 Ma yomakai, una remanu uni utari bi kono ruba toragade amedo, dada kaere minari gutu uga bae nego vo nigo bi rena anua rego ma mirona eta rofu uga baina ka rena anua rego.’ 27 Kamini mina gugura tau amiye yaku niyo, ‘Makai vo nisi bi ya ni guba reida, baba Abraham, Lazarus nai baba di yavari ni feide. 28 Mironari bi nai dubuiyaka vana berou autu. Ni feidegiya kumo nesi ni oteimago mina esika sanari ina ka ga baiyagane.’

29 “Idu Abraham yaku niyo, ‘Moses ma Sei di ago nidedi vene di ini ago bi ina vene sa; ina rofu maka ago neideyagane.’ 30 Idu mina gugura tau amiye yaku niyo, ‘Baba Abraham, mina bi buni de! Amiye yokoi muyenari gutu ina vene rofu dadisi boi nego ri vo nisi, bi ini vegu no feresi moi etaga rigedi.’ 31 Idu Abraham yaku niyo, ‘Moses ma Sei di ago nidedi vene di ago de neidegedi vo nisi, bi muyena amiye dadigo rofu yaku ka ini uka de moi kero regedi.’”